'करोना' व्हायरसच्या भीतीपोटी जगभरातच लोक गर्दी करणं टाळत आहेत. अनेक नियोजित कार्यक्रम रद्द केले जात आहेत. औरंगाबाद मधील पैठण येथील प्रसिद्ध नाथषष्ठी यात्रा देखील याच कारणास्तव स्थगित करण्यात आली आहे.
मराठवाड्यातील अत्यंत लोकप्रिय व लाखो नाथभक्तांना एकत्र आणणारी नाथषष्ठी यात्रा स्थगित करण्यात आली आहे. 'करोना' व्हायरसच्या पार्श्वभूमीवर एवढ्या मोठ्या संख्येनं लोकांनी एकत्र येणं योग्य नसल्यानं ही यात्रा स्थगित करण्याचे आदेश जिल्हाधिकारी कार्यालयानं दिले आहे.
मराठवाड्यात अनेक ठिकाणी सध्या यात्रांचे हंगाम सुरू झाले आहेत. मराठवाड्यातील प्रत्येक जिल्ह्यात पुढील काही दिवसांत यात्रा आहेत. औरंगाबाद जिल्ह्यातील नाथषष्ठी, लाखो लोक या यात्रेनिमित्ताने एकत्र येत असतात. नाथषष्ठी यात्रा १४ ते १६ मार्च दरम्यान पैठण येथे भरणार होती.
मात्र, ती तूर्त स्थगित देण्यात आली आहे.
'करोना' व्हायरस नियंत्रणाच्या पार्श्वभूमीवर सोमवारी आयुक्तालयात बैठक घेण्यात आली. पूर्वतयारीनिमित्त आयोजित या बैठकीला जिल्हाधिकारी, घाटी अधिष्ठाता, आरोग्य उपसंचालक, पोलिस तसेच महापालिकेचे अधिकारी उपस्थित होते. मराठवाड्याच्या आठही जिल्हाधिकाऱ्यांनी आपापल्या जिल्ह्यात प्रत्येकी २ कोटी रुपये 'करोना' व्हायरसवरील उपचारासाठी राखून ठेवावेत,’ असे आदेश विभागीय आयुक्त सुनील केंद्रेकर यांनी सोमवारी दिले होते. मराठवाड्यातील जिल्हा शल्यचिकित्सक, एनआरएचएम अंतर्गतही रक्कम राखीव ठेवण्यास सांगण्यात आले आहे.