देवगड येथे दत्त जयंती निमीत्त धार्मिक कार्यक्रम

गंगापूर, (प्रतिनिधी) : दिगंबरा दिगंबरा श्रीपाद वल्लभ दिगंबरा अशा जयघोषासह पुष्पवृष्टी व शंखाचा निनाद करत नेवासा तालुक्यातील भू-लोकीचा स्वर्ग अशी ओळख असलेल्या गुरुदेव दत्तपीठ श्री क्षेत्र देवगड येथे गुरूवारी सायंकाळी ६ वाजता भगवान दत्तात्रयांचा जन्म सोहळा गुरूदेव दत्त पिठाचे प्रमुख राष्ट्रसंत गुरुवर्य महंत श्री भास्करगिरीजी महाराज यांच्या मार्गदर्शनाखाली संत महंतांच्या उपस्थितीत भक्तिमय वातावरणात साजरा करण्यात आला. दत्तजयंती महोत्सवाच्या कालावधीत लाखो भाविकांनी येथे हजेरी लावून भगवान दत्तात्रयांचे दर्शन घेतले.

झालेल्या श्री दत्त जन्म सोहळ्याच्या प्रसंगी गुरुवर्य श्री भास्करगिरीजी महाराज व उत्तराधिकारी स्वामी श्री प्रकाशानंदगिरीजी महाराजांच्या हस्ते भगवान दत्तात्रयांच्या मूर्तीचे पूजन करण्यात आले.श्री दत्त जन्म सोहळयाच्या प्रसंगी मंदिरासमोरील कीर्तन मंडपात पुष्पांनी सजविलेल्या पुष्प मंडपात भगवान दत्तात्रयांची मूर्ती पाळण्यात ठेवण्यात आली होती. संत महंतांच्या हस्ते

विधिवत पूजन झाल्यानंतर वेदमंत्राच्या जयघोष पुष्पवृष्टी करत भगवान दत्तात्रयांचा जन्मोत्सव साजरा करण्यात आला.

यावेळी गुरुवर्य भास्करगिरीजी महाराज, उत्तराधिकारी स्वामी श्री प्रकाशानंदगिरीजी महाराज, प्रयागराज येथील स्वामी पंडितराज मिश्रा, महंत कैलासगिरी महाराज, महंत रमेशानंदगिरीजी महाराज, महंत आवेराज महाराज यांच्या हस्ते पाळण्याची दोरी ओढण्यात आली. नेवासा येथील गायिका माधुरी कुलकर्णी यांनी दत्त जन्माचा पाळणा म्हटला, झालेल्या जन्मोत्सव सोहळ्याच्या प्रसंगी बोलताना गुरुवर्य श्री भास्करगिरीजी महाराज म्हणाले की सदगुरू किसनगिरी बाबांनी आपल्या आराधनेच्या माध्यमातून भक्तांना सुख शांती प्राप्त होण्यासाठी भगवान दत्तात्रयांना येथे विराजमान केले. भगवान दत्तात्रय हे ब्रम्हा, विष्णू, महेश अशी तीन रूपे असून देव देश धर्म याचे पालन करा, असाच संदेश या तीन रूपे असलेले भगवान दत्तात्रय देतात. तपश्चर्याच्या माध्यमातून दैवताला प्राप्त करण्याचा प्रयत्न करा, धर्माच्या कार्यात कसर रहाता कामा नये,

कर्माच्या गाठी सुटण्यासाठी धार्मिक विधी पूजापाठ करा असे आवाहन त्यांनी या प्रसंगी बोलताना केले. श्री दत्त जन्म सोहळ्याच्या प्रसंगी स्वामी प्रकाशानंद गिरीच्या मातोश्री मीराबाई मते पाटील, महंत कैलासगिरीजी महाराज, महंत रमेशानंदगिरी महाराज, जनार्धन महाराज मेटे, जिल्हा परिषदेच्या माजी अध्यक्षा शालीनी विखे पाटील, नेवासा तालुक्याचे आमदार विठ्ठलराव लंघे पाटील, माजी आमदार पांडुरंग अभंग, बाळासाहेब मुरकुटे, काशिनाथ अण्णा नवले, विश्व हिंदू परिषदेचे अप्पा बारगजे, पोलीस निरीक्षक महेश पाटील, देवगड सेवेकरी सुरक्षाधिकारी भाऊ नांगरे, अशोक तांबे होमगार्ड समादेशक बाळासाहेब देवखिळे, विष्णूपंत ठोसर यांच्यासह हजारो भाविक उपस्थित होते.

 दत्तजयंती निमित्त पहाटे ४ च्या सुमारास गुरुदेव दत्त पिठाचे प्रमुख गुरुवर्य भास्करगिरी बाबा व उत्तराधिकारी स्वामी प्रकाशानंदगिरीजी महाराज यांच्या हस्ते वेदमंत्राच्या जयघोषात भगवान दत्तात्रयांसह श्री समर्थ सदगुरू किसनगिरी बाबांच्या मूर्तीस अभिषेक घालण्यात आला. अभिषेक

प्रसंगी झालेल्या धार्मिक कार्यक्रमाचे पौरोहित्य वेदशास्त्र संपन्न ग्रामपुरोहित शरदगुरू काटकर, भेंडे येथील आचार्य गणेशदेवा कुलकर्णी आदी ब्रम्हवृंद मंडळींनी केले. दत्तजयंतीच्या निमित्ताने सकाळी श्री समर्थ सदगुरू किसनगिरी बाबांच्या पालखीची मंदिर प्रांगणात प्रदक्षिणा मिरवणूक काढण्यात आली. या मिरवणुकीमध्ये गुरुवर्य श्री भास्करगिरीजी महाराज स्वामी प्रकाशानंदगिरीजी महाराज यांच्या समवेत संत महंत वारकरी भाविक मोठ्या संख्येने सहभागी झाले होते. हातात भागवत धर्माची पताका घेतलेले वारकरी, टाळ मृदृगाचा गजर करणारे भजनी सेवेकरी सर्व भाविकांचे आकर्षण ठरले होते. दुपारच्या सत्रात ब्रम्हवृंद मंडळींच्या उपस्थितीत पाच दिवस येथील यज्ञ मंडपात चाललेल्या श्री दत्त यागाची गुरुवर्य श्री भास्करगिरीजी बाबांसह स्वामी प्रकाशानंदगिरीजी महाराज यांच्या हस्ते विधिवत पूजेने पूर्णाहुती देऊन सांगता करण्यात आली. यावेळी दत्त यागाचे पौरोहित्य करणाऱ्या सर्व ब्रम्हवृंद मंडळींचा पाचीपोषाख देऊन सत्कार करण्यात आला.

भगवान दत्तात्रयांचा जन्म सोहळा उत्साहपूर्ण वातावरणात: 

भगवान दत्तात्रयांचा जन्म : 

सोहळा उत्साहपूर्ण वातावरणात पडल्यानंतर उपस्थित भाविकांना मंदिर परिसरात असलेल्या प्रांगणात महाप्रसादाचे वाटप करण्यात आले. दत्तजयंतीच्या निमित्ताने मंदिर परिसरात मोठी यात्रा भरली होती. या यात्रेमध्ये विविध प्रकारची स्टॉल थाटण्यात आली होती. ग्रामीण रुग्णालयासह पंचायत समिती प्राथमिक आरोग्य केंद्राच्या वतीने दर्शनासाठी आलेल्या भाविकांची मोफत आरोग्य तपासणी करण्यात आली. नेवासा पोलीस स्टेशनच्या वतीने नेवासा पोलीस स्टेशनचे पोलीस निरीक्षक महेश पाटील व होमगार्ड दलाचे समादेशक बाळासाहेब देवखिळे यांच्या मार्गदर्शनाखाली यात्रेत चोख बंदोबस्त ठेवण्यात आला होता.  पोलिस व होमगार्ड यांनी परिस्थितीवर नियंत्रण ठेऊन बंदोबस्त दिला.तर देवगड भक्त परिवारातील स्वयंसेवक सेवेकरी यांनी देखील सेवेच्या माध्यमातून मोलाची भूमिका बजावली.