शहरालगतचा ईटखेडा हा माजी महापौर नंदकुमार घोडेले यांचा सुरक्षित वार्ड समजला जातो. घोडेले कुटुंबाचे राजकीय वर्चस्व या भागात चालते. दोन वेळा महापौरपद भोगलेल्या या कुटुंबाने आता वार्डाची नव्याने राजकीय बांधणी सुरू केली आहे. प्रत्येक कुटुंबाचे सर्वेक्षण करून खडान्खडा माहिती महापौरांचे कार्यकर्ते गोळा करीत आहेत. त्यातच कोरोना संकटाच्या काळात आर्थिक अडचणीत आलेल्या कुटुंबाची माहिती कार्यकर्त्यांनी गोळा केली. वार्डातील बचत गटांच्या महिलांनी शहरातील विविध छोट्या-मोठ्या बँकांकडून कर्ज घेतले आहे. ही संख्या मोठी असल्याने घोडेले यांनी आपले राजकीय घोडे दामटले. गेल्या आठवडाभरापासून प्रत्येक कुटुंबाशी संपर्क साधत बचत गटातील कर्जाचे हप्ते भरू नका असे आवाहन घोडेले यांचे समर्थक करीत फिरत आहेत. आपण भोगलेल्या पदाचा फायदा घेत माजी महापौर घोडेले यांनी थेट बचत गटांना कर्ज दिलेल्या बँकांना फोन करणे सुरू केले. तीन दिवसांपासून सतत शहरातील वेगवेगळ्या खाजगी पतसंस्था, बँकांना घोडेले यांचे फोन जात आहेत.

दरम्यान काल घोडले यांच्या आदेशाने शहरातील छोट्या पतसंस्था तसेच बँकांना फोन करण्यात आले. ईटखेड्यात आयोजित केलेल्या बैठकीला आपला प्रतिनिधी काढण्याचे फर्मान बँकांना सोडण्यात आले. त्यानुसार आज सकाळी अकराच्या सुमारास बँकांचे प्रतिनिधी ईटखेड्यात दाखल झाले.