फिरोजपूर : पंजाबमधील फिरोजपूर येथील फाजिल्का रोडवर शनिवारी सकाळी ६ जून, २०२६ झालेल्या एका भीषण रस्ते अपघातात आठ जणांचा मृत्यू झाला आहे. जंगा वळणाजवळ पिकअप ट्रक आणि घोडागाडी यांच्यात झालेल्या समोरासमोरच्या धडक झाली. या अपघातात १५ हून अधिक जण जखमी झाले. अनेक जखमींची प्रकृती गंभीर असल्याचे वृत्त आहे.
मिळालेल्या माहितीनुसार, पिकअप ट्रकमधील लोक एका कुटुंबीयाच्या अस्थींचे विसर्जन करण्यासाठी जात होते. प्रवासादरम्यान, ज्यावेळी त्यांचे वाहन टेकडीच्या वळणावर पोहोचले, त्यावेळी समोरून येणार्या घोडागाडीला त्याची धडक बसली. प्रत्यक्षदर्शींच्या मते, ही धडक इतकी जोरदार होती की पिकअप ट्रकचा पुढचा भाग पूर्णपणे उद्ध्वस्त झाला, यामध्ये अनेक जण अडकले होते.
कुटुंब पहाटे ३:३० वाजता निघाले होते
पिकअप ट्रकमध्ये असलेल्या अंशप्रीतने सांगितले की, पहाटे ३.३० वाजता सुमारे ३० लोक अस्थी घेऊन घरातून बाहेर पडले होते. गाडीत पेट्रोल भरल्यानंतर, ते जंगाव वळणाजवळ पोहोचताच, त्यांच्या पिकअप ट्रकची रस्त्याच्या मधोमध उभ्या असलेल्या एका ट्रेलरला अचानक धडक बसली. ही धडक इतकी जोरदार होती की गाडी उलटली. पिकअप ट्रकला छप्पर होते, यामध्ये कुटुंबातील काही सदस्य बसले होते.
उपस्थित लोकांनी तात्काळ बचावकार्य सुरू केले आणि वाहनातून जखमींना बाहेर काढण्यास मदत केली. त्यानंतर रुग्णवाहिका आणि इतर साधनांच्या साहाय्याने सर्व जखमींना उपचारासाठी सिव्हिल हॉस्पिटलमध्ये नेण्यात आले. सूत्रांनुसार, काही जणांचा घटनास्थळीच मृत्यू झाला, तर अनेक जण गंभीर जखमी झाले. रुग्णालयात पोहोचताच वैद्यकीय पथकांनी तात्काळ उपचार सुरू केले.
