नवी दिल्ली : मतदार यादीच्या विशेष सखोल पुनरीक्षणातील कथित गैरव्यवहार आणि मुख्य निवडणूक आयुक्त ज्ञानेश कुमार यांच्या राजीनाम्याच्या मागणीवरून दिल्लीत मोठा राजकीय संघर्ष पेटला आहे. 'कॉकरोच जनता पार्टी'ने आज, शुक्रवारी सायंकाळी ५ वाजता नवी दिल्लीतील कनॉट प्लेस येथील सेंट्रल पार्कमध्ये 'लहरा दो तिरंगा' अभियानांतर्गत भव्य तिरंगा रॅलीची हाक दिली आहे. मात्र, या आंदोलनापूर्वीच राजधानीत प्रचंड पोलीस बंदोबस्त तैनात करण्यात आला असून, पक्षाचे संस्थापक अभिजित दिपके वास्तव्यास असलेल्या राष्ट्रवादी काँग्रेसचे (शरद पवार गट) प्रवक्ते अनिश गावंडे यांच्या झंडेवालान येथील बंगल्यावर दिल्ली पोलिसांचे पथक पोहोचले आहे. दिपके यांनी गुरुवारी रात्रीच पत्रकार परिषद घेऊन आपल्याला पोलीस बेकायदेशीरपणे ताब्यात घेण्याची शक्यता वर्तवली होती.

'कॉकरोच जनता पार्टी'चे संस्थापक अभिजित दिपके यांच्या कनॉट प्लेस येथील प्रस्तावित आंदोलनापूर्वी दिल्लीत राजकीय नाट्य शिगेला पोहोचले आहे. शुक्रवारी सायंकाळी ५ वाजता होणाऱ्या आंदोलनाच्या पार्श्वभूमीवर दिल्ली पोलिसांचे पथक दिपके थांबलेल्या ठिकाणी पोहोचले आणि त्यांना आंदोलन न करण्याबाबतची अधिकृत कायदेशीर नोटीस बजावली. या वेळी पोलिसांच्या भूमिकेवर अभिजित दिपके यांनी तीव्र संताप व्यक्त केला.

'आप'ची २०० फूट लांब तिरंग्यासह एंट्री; सौरभ भारद्वाज आक्रमक

दिल्लीत या आंदोलनाला पाठिंबा दर्शवत आम आदमी पक्षाचे नेते २०० फूट लांब तिरंगा हाती घेऊन रस्त्यावर उतरले. आप नेते सौरभ भारद्वाज यांनी केंद्र सरकारवर निशाणा साधला. "स्वातंत्र्यलढ्यात ब्रिटीश म्हणायचे की फक्त युनियन जॅक फडकवला जाईल, आणि स्वातंत्र्यसैनिक तिरंगा फडकवण्याचा निर्धार करायचे. आज देशात तिरंगा फडकवण्यावरच निर्बंध लादले जात आहेत. देशाचा तिरंगा फडकवणे कधीपासून गुन्हा ठरले? तिरंगा रोखण्यासाठी पोलीस छावणी उभी केली जात आहे."

मुंबईच्या आझाद मैदानात तिरंगा रॅलीला परवानगी

दिल्लीत रॅलीवर बंदी घालण्यात आली असली, तरी मुंबई पोलिसांनी सीजेपीला दक्षिण मुंबईतील आझाद मैदानात सकाळी ११ ते सायंकाळी ५ या वेळेत शांततापूर्ण तिरंगा आंदोलन करण्याची अधिकृत परवानगी दिली आहे. पक्षाचे सहकारी आशुतोष रांका आणि सौरव दास यांना न्यायालयीन कोठडीत पाठवल्याच्या निषेधार्थ हे आंदोलन सुरू असून जोपर्यंत मागण्या मान्य होत नाहीत, तोपर्यंत संघर्ष सुरूच ठेवण्याचा इशारा कार्यकर्त्यांनी दिला आहे.