पुणे : दारू पिण्यासाठी पैसे न दिल्याच्या रागातून मुलाने स्वतःच्या आईची हत्या केल्याची धक्कादायक घटना पुणे जल्ह्यातील भोर तालुक्यात घडली आहे. वेळवंड खोर्यातील म्हाळवडी गावात ही घटना घडली. या घटनेमुळे परिसरात एकच खळबळ उडाली आहे. या घटनेत बेबी काळू मालुसरे यांचा मृत्यू झाला असून, पोलिसांनी त्यांचा मुलगा समीर काळू मालुसरे याला ताब्यात घेतले आहे.
याबाबत मिळालेल्या माहितीनुसार, समीर मालुसरे याने त्याची आई बेबी यांच्याकडे दारू पिण्यासाठी पैसे मागितले होते. मात्र, आईने पैसे देण्यास नकार दिल्याने समीर संतापला. रागाच्या भरात समीरने लोखंडी रॉड घेऊन आईच्या डोक्यात आणि तोंडावर वार केले. या हल्ल्यात बेबी मालुसरे गंभीर जखमी झाल्या. मात्र, या हल्ल्यात त्यांचा मृत्यू झाला. दारूच्या पैशांवरून झालेल्या वादातून मुलानेच आईवर हल्ला केल्याने या घटनेने परिसरातील नागरिकांमध्ये संताप व्यक्त केला जात आहे.
हत्या केल्यानंतर मृतदेह घरातच ठेवला
आईचा मृत्यू झाल्यानंतर त्याने बेबी मालुसरे यांचा मृतदेह घरातच ठेवला आणि घराला बाहेरून कुलूप लावले. यानंतर त्याने शेजार्यांना आई गावाला गेल्याचे सांगितले. त्यामुळे काही काळ शेजार्यांना बेबी मालुसरे यांच्याबाबत संशय आला नाही. काही तासांनंतर समीर पुन्हा घराजवळ आला. त्यावेळी त्याने आई घरातच असल्याचे सांगितले. मात्र, दरम्यानच्या काळात बेबी मालुसरे यांच्या मृत्यूची माहिती स्थानिकांना मिळाली.
पोलिसांनी आरोपी मुलाला घेतले ताब्यात
घटनेची माहिती मिळताच स्थानिकांनी भोर पोलिसांशी संपर्क साधला. माहिती मिळताच पोलिसांनी घटनास्थळी धाव घेतली. पोलिसांनी घराची पाहणी केल्यानंतर घटनेची माहिती घेतली आणि आरोपी समीर मालुसरे याला ताब्यात घेतले. या प्रकरणी पोलिसांकडून पुढील तपास सुरू आहे.
नेमका घटनाक्रम तपासातून समोर येणार
दारूसाठी पैसे न दिल्याच्या रागातूनच समीरने आईची हत्या केली का, यासह या घटनेमागील इतर कारणांचा पोलीस तपास करत आहेत. घटनास्थळावरील परिस्थिती आणि उपलब्ध पुराव्यांच्या आधारे पोलिसांकडून तपास केला जात आहे. या धक्कादायक घटनेने भोर तालुक्यात खळबळ उडाली असून, दारूच्या व्यसनातून घडलेल्या या प्रकारामुळे परिसरात संताप व्यक्त केला जात आहे. प्रकरणाचा पुढील तपास भोर पोलीस करत आहेत.
