मुंबई : राज्याचे क्रीडामंत्री माणिकराव कोकाटे यांना सदनिका घोटाळा प्रकरणात सुनावण्यात आलेली दोन वर्षांच्या कारावासाची शिक्षा नाशिक जिल्हा न्यायालयाने कायम ठेवली आहे. नाशिक जिल्हा न्यायालयाने १६ नोव्हेंबर रोजी याबाबतचा निकाल दिला होता. त्यानंतर आता दुसर्या दिवशी पोलिसांकडून माणिकराव कोकाटे यांना अटक करण्याच्या हालचाली सुरु झाल्या आहेत. कोणत्याही क्षणी माणिकराव कोकाटे यांच्याविरोधात अटक वॉरंट जारी होण्याची शक्यता आहे.
माणिकराव कोकाटेंविरोधात अटक वॉरंट निघावं, यासाठी अर्ज दाखल करण्यात आला आहे. न्यायदंडाधिकारी यांच्या कोर्टात अटक वॉरंटसाठी अंजली दिघोळे यांनी अर्ज दाखल केला आहे. अंजली दिघोळे यांच्या अर्जावर न्यायालय काय निर्णय घेणार याकडे आता सगळ्यांचं लक्ष लागलंय. अटक वॉरंट निघाल्यास पक्षाची कोंडी होऊ शकते. त्यामुळे आता अजित पवार काय निर्णय घेणार याकडे राजकीय वर्तुळाचे लक्ष लागले आहे. याचदरम्यान, आज सकाळी अजित पवार यांनी मुख्यमंत्री देवेंद्र फडणवीस यांची वर्षा या निवासस्थानी भेट घेतील. या भेटीत मंत्री माणिकराव कोकाटेंच्या राजीनाम्यावरुन चर्चा झाल्याची माहिती समोर आली आहे.
देवेंद्र फडणवीस आणि अजित पवारांच्या भेटीत काय घडलं?
अजित पवार यांनी आजच्या भेटीत देवेंद्र फडणवीस यांना माणिकराव कोकाटे यांच्या प्रकरणाची माहिती दिली. त्यानंतर देवेंद्र फडणवीस यांनी माणिकराव कोकाटे यांच्या राजीनाम्याबाबतचा निर्णय तुम्हीच घ्या, असे अजित पवार यांना सांगितले. तसेच माणिकराव कोकाटेंचं खातं कोणाला द्यायचं सांगा, असा थेट प्रश्नही देवेंद्र फडणवीसांनी अजित पवारांना यावेळी विचारल्याचे विश्वासनीय सूत्रांची माहिती आहे. हायकोर्टाने निर्णयाला स्थगिती दिली, तरच माणिकराव कोकाटेंचे मंत्रिपद वाचू शकते. पण, तसे न झाल्यास माणिकराव कोकाटेंचे खाते कुणाला द्यायचे, ते सांगा, असे मुख्यमंत्री देवेंद्र फडणवीस यांनी वर्षावरील भेटीत अजित पवारांना विचारल्याची माहिती समोर आली आहे.
माणिकराव कोकाटेंना दोन वर्षांच्या कारावासाची शिक्षा, नेमकं प्रकरण काय?
नाशिक शहरातील उच्चभ्रू परिसरात माणिकराव कोकाटे यांनी ३० वर्षांपूर्वी अल्प उत्पन्न गटातून सदनिका मिळवली होती. स्वत:सह भाऊ विजय कोकाटे, पोपट सोनवणे आणि प्रशांत गोवर्धने या चार जणांनी कॅनडा कॉर्नर भागात निर्माण व्ह्यू अपार्टमेंटमध्ये मुख्यमंत्री कोट्यातून अल्प उत्पन्न गटासाठीच्या सदनिका प्राप्त केल्या होत्या. यानंतर तत्कालीन दिवंगत राज्यमंत्री तुकाराम दिघोळे यांच्या तक्रारीवरून जिल्हा प्रशासनाने सदनिका वाटपाची चौकशी केली होती. प्रथम वर्ग न्यायालयाने या प्रकरणात माणिकराव कोकाटे यांच्यासह त्यांच्या भावाला प्रत्येकी दोन वर्षांचा कारावास आणि ५० हजारांचा दंड अशी शिक्षा सुनावली होती. या निर्णयाविरोधात माणिकराव कोकाटे यांनी जिल्हा न्यायालयात धाव घेतली होती. परंतु, मंगळवारी झालेल्या सुनावणीत जिल्हा न्यायालयाने कनिष्ठ न्यायालयाचा निर्णय कायम ठेवला. त्यामुळे माणिकराव कोकाटे यांच्या अडचणी वाढल्या आहेत.
कोणत्याही क्षणी अटकेची शक्यता...
सदनिका घोटाळाप्रकरणात न्यायालयाकडून दोन वर्षांच्या कारावसाची शिक्षा सुनावण्यात आलेले राज्याचे क्रीडामंत्री माणिकराव कोकाटे यांना कोणत्याही क्षणी अटक होण्याची शक्यता असल्याची माहिती समोर आली आहे. माणिकराव कोकाटे यांच्या नावाने अटक वॉरंट काढण्यासाठी प्रथम वर्ग न्याय न्यायदंडाधिकारी यांच्या कोर्टात अर्ज दाखल करण्यात आला आहे. कोकाटे यांच्याविरोधात हस्तक्षेप याचिका दाखल करणार्या अंजली दिघोळे राठोड यांनी हा अर्ज दाखल केला आहे. अंजली दिघोळे यांच्या अर्जावर न्यायालय काय निर्णय घेणार याकडे लक्ष लागले आहे. दरम्यान क्रीडा मंत्री माणिकराव कोकाटे उच्च न्यायालयात धाव घेणार असल्याची माहिती समोर येत आहे.
