राज्यातील प्रमुख विरोधी पक्षाच्या नेत्यांनी, महाविकास आघाडीच्या प्रमुखांनी आज राज्य निवडणूक आयुक्त कार्यालयात जाऊन मुख्य निवडणूक आयुक्तांची भेट घेतली. यावेळी, आपले निवदेन देत अनेकांनी विविध प्रश्‍नांची सरबत्ती केली. मनसेप्रमुख राज ठाकरे यांनीही 7 ते 8 महत्वाचे प्रश्‍न विचारले होते. त्यामध्ये, मतदार यादीत नाव नोंदवणे का बंद केले, नावे समाविष्ट करणे किंवा वगळण्याबाबतही प्रश्‍न होते. आता, यावर राज्य निवडणूक आयुक्त दिनेश वाघमारे यांनी स्पष्टीकरण व उत्तर दिले आहे. आगामी स्थानिक स्वराज्य संस्थांच्या निवडणुकांसाठी वापरली जाणारी, विधानसभा मतदारसंघाच्या मतदार यादीत नव्याने नावे समाविष्ट करणे किंवा नावे वगळण्याची कार्यवाही किंवा अन्य बदल करण्याचा विषय राज्य निवडणूक आयोगाच्या कार्यकक्षेत येत नाही, असे आयुक्त दिनेश वाघमारे यांनी म्हटले आहे.