वन विभागाची कारवाई; शेतकऱ्यांच्या
मदतीने बिबट्याला पकडण्यात यश
गंगापूर, (प्रतिनिधी) : गंगापूर तालुक्यातील वरखेड येथे गेल्या काही दिवसांपासून पाळीव प्राण्यांची शिकार करणाऱ्या बिबट्याला वन विभागाने पिंजऱ्यात जेरबंद केले. वन विभागाच्या या कारवाईमुळे परिसरातील शेतकरी व ग्रामस्थांनी सुटकेचा निःश्वास सोडला आहे.
वरखेड परिसरात गेल्या काही दिवसांपासून बिबट्याचा वावर असून, तो पाळीव प्राण्यांची शिकार करत असल्याने शेतकऱ्यांमध्ये भीतीचे वातावरण निर्माण झाले होते. बिबट्याला पकडण्यासाठी वन विभागाने काल परिसरात पिंजरा लावला होता. त्यानंतर शेतकऱ्यांच्या सहकार्याने बिबट्याला पिंजऱ्यात जेरबंद करण्यात यश आले.
बिबट्याला पकडण्यासाठी शेतकरी लक्ष्मण उबाळे, गौतम उबाळे, सागर सोनवणे व दीपक बडे यांनी ट्रॅक्टरच्या सहाय्याने त्याचा पाठलाग करून वन विभागाला मदत केली. त्यांच्या सहकार्यामुळे बिबट्याला पकडणे शक्य झाले. बिबट्या जेरबंद झाल्याची माहिती मिळताच परिसरातील ग्रामस्थांनी समाधान व्यक्त केले.
वन विभागाच्या पथकाने बिबट्याला ताब्यात घेतले असून, पुढील कार्यवाही वन विभागाच्या नियमानुसार करण्यात येणार आहे.
