भाजप देशात युद्धसदृश्य परिस्थिती निर्माण करील असे आपण 2015 साली वर्तवलेले भाकित खरे ठरले, असे सांगून ते म्हणाले, कल्याण-डोंबिवली महापालिकेच्या निवडणुकांच्या आधीच मी हा अंदाज पत्रकार परिषदेत वर्तवला होता. मी ज्योतिषी नाही;पण हे काय करू शकतात याचा अंदाज मी सहजपणे व्यक्‍त केला होता व नंतर तसेच झाले. आम्हाला राष्ट्रभक्‍ती शिकवणारे नरेंद्र मोदी आहेत कोण? तुम्ही स्वतःला देशभक्‍त म्हणवता तर नवाज शरीफ यांना भेटायला, त्यांच्या वाढदिवशी त्यांना केक भरवायला का गेला होता, असा सवालही राज यांनी केला. राज म्हणाले, पुलवामा हल्‍ला झाला, त्यानंतर ‘एअर स्ट्राईक’ झाला. मग या सगळ्यांची देशभक्‍ती बाहेर आली होती. आता ही राष्ट्रभक्‍ती काय कपाटात बंद करून ठेवली आहे का? अजित डोवाल यांच्या मुलाची एक कंपनी असून, त्यात एक अरब तर एका पाकिस्तानी माणसाची भागीदारी आहे. हे भाजपला चालते;पण हे जर इतर कोणी केले असते तर त्याला राष्ट्रद्रोही किंवा देशद्रोही ठरवले असते. बालाकोटमध्ये भारताने केलेल्या ‘एअर स्ट्राईक’मध्ये अडीचशे, तीनशे दहशतवादी मारले गेले, असा दावा भाजप अध्यक्ष अमित शहा करतात. हल्‍ला करायला गेलेल्या विमानाचे ते सहवैमानिक होते काय, असा खोचक सवालही ठाकरे यांनी केला. लष्करातील जवानांपेक्षा व्यापारी हे जास्त साहसी असतात, असे बोलत असतानाची पंतप्रधान नरेंद्र मोदी यांची एक क्लिपही त्यांनी यावेळी दाखविली.

2006 मध्ये मनसेची स्थापना झाल्यापासून या पक्षाने आपली एक स्वतंत्र अशी वाट चोखाळली आहे. मनसेचा एक स्वतंत्र मतदारवर्ग आहे. 2009 च्या लोकसभा निवडणुकीत मनसेला 15 लाख 3 हजार 863 मते तर 2014 च्या लोकसभा निवडणुकीत 7 लाख 8 हजार मते मिळाली होती. बदलत्या राजकीय परिस्थितीत भाजपची हार हीच मनसेची जीत, असे मानून मनसेने 2019 ची लोकसभा निवडणूक संपूर्ण ताकदीनिशी लढवायला हवी, असा एक मतप्रवाह आहे. या मेळाव्यात राज ठाकरे लोकसभा निवडणुकीबाबत निर्णय जाहीर करतील, अशी अपेक्षा होती. मात्र, राज यांनी लोकसभा निवडणुकीत मनसे नेमकी काय भूमिका घेणार हे गूढ कायम ठेवले. मनसेसाठी इतर पक्षांकडे जागा मागत बसायला मी काही प्रकाश आंबेडकर नाही, असा टोला लगावत लवकरच लोकसभा निवडणुकीबाबतचा निर्णय जाहीर करेन, असे राज ठाकरे यांनी यावेळी सांगितले.