सिल्लोड (प्रतिनिधी) : केंद्र व राज्य शासनाच्या मार्गदर्शक सूचनांनुसार जागतिक शौचालय दिनानिमित्त जिल्हा परिषदेच्या स्वच्छ भारत मिशन (ग्रामीण) विभागामार्फत हमारा शौचालय, हमारा भविष्य ही विशेष मोहिम १९ नोव्हेंबर २०२५ पासून सुरू करण्यात आली असून, ही मोहीम मानवी हक्क दिनापर्यंत म्हणजे १० डिसेंबर २०२५ पर्यंत राबविण्यात येणार आहे.
जिल्हा परिषदेचे मुख्य मुख्य कार्यकारी अधिकारी तथा प्रशासक अंकित यांच्या मार्गदर्शनाखाली गटविकास अधिकारी पंचायत समिती सिल्लोड रत्नाकर पगार यांनी सिल्लोड तालुक्यातील सर्व ग्रामपंचायती, तालुकास्तरीय अधिकाऱ्यांना स्वच्छतेचा संकल्प करूया, निरोगी भारत घडवूया !
मोहिमेची प्रभावी अंमलबजावणी करण्याचे आवाहन केले आहे.
शौचालये ही केवळ कुणी सांगितले म्हणून केलेली शोभेची वास्तू नव्हे तर आरोग्य, प्रतिष्ठा व सुरक्षिततेची हमी देणारी मूलभूत गरज असल्याचे त्यांनी नमूद केले. या मोहिमेअंतर्गत सिल्लोड तालुक्यातील सर्व गावातील वैयक्तिक शौचालये व सामुदायिक शौचालयांची तपासणी, दुरुस्ती, देखभाल व सुशोभीकरणावर विशेष लक्ष देण्यात येणार आहे. अपूर्ण किंवा दुरुस्तीची गरज असलेली वैयक्तिक तसेच सार्वजनिक शौचालये यांची नोंद घेऊन त्यांची दुरुस्ती करण्याचे निर्देश देण्यात आले आहेत.
या कालावधीत शाळा, अंगणवाडी, ग्रामसभा, स्वयंसहाय्य गट, युवक मंडळे, निवृत्त सैनिक, सामाजिक कार्यकर्ते यांचा सहभाग घेऊन स्वच्छता, आरोग्य, सुरक्षित मलनिस्सारण तसेच हवामान अनुकूल स्वच्छतेबाबत जनजागृती केली जाणार आहे. ग्रामस्थांना त्यांच्या वैयक्तिक व सार्वजनिक शौचालयांची रंगरंगोटी, सुशोभीकरण आणि नियमित देखभाल करण्यासाठी प्रोत्साहित केले जाईल. २१
नोव्हेंबर ते ५ डिसेंबर या कालावधीत गावागावांत मोहिमेचे विविध उपक्रम राबविण्यात येतील. उत्तम देखभाल व सुशोभीकरण करणाऱ्या वैयक्तिक शौचालये व सामुदायिक शौचालये वापरणाऱ्या कुटुंबीयांचा अंतिम टप्प्यात विशेष गौरव करण्यात येणार आहे.
१० डिसेंबर रोजी मोहिमेचा समारोप करून उत्कृष्ट शौचालय पुरस्कार जाहीर केले जातील. तरी या मोहिमेत सर्व ग्रामस्थांनी सहभागी व्हावे, असे आवाहन मुख्य कार्यकारी अधिकारी अंकित व जिल्हा पाणी स्वच्छता मिशनच्या उपमुख्य कार्यकारी अधिकारी अनुपमा नंदनवनकर यांच्या मार्गदर्शनाखाली गटविकास अधिकारी वर्ग एक पंचायत समिती सिल्लोड रत्नाकर पगार यांनी केले आहे.
