नवी दिल्ली : पंतप्रधाननरेंद्र मोदी यांनी भारताच्या अवकाश स्टार्टअप्सची प्रशंसा केली. २० स्पेस स्टार्टअप्सच्या सीईओ आणि संस्थापकांशी बोलताना ते म्हणाले की, भारतात प्रतिभेची कमतरता नाही. देशाने अवकाश क्षेत्रात खूप काही साध्य केले आहे. जोखीम पत्करा, सरकार तुमच्या पाठीशी आहे. या संभाषणादरम्यान, पंतप्रधान मोदींनी देशात असे वातावरण निर्माण करण्याचे आवाहन केले, जे जगभरातील प्रतिभेला आकर्षित करेल. स्टार्टअप्सच्या सीईओ आणि संस्थापकांशी बोलताना पंतप्रधानांनी धोरणांवर भर दिला आणि म्हणाले की, चांगली धोरणे जोखीम पत्करणाऱ्यांना आत्मविश्वास देतात.

पंतप्रधान मोदी म्हणाले, "तुम्ही एका नवीन क्षेत्रात धाडस दाखवले आहे. सर्वात महत्त्वाची गोष्ट म्हणजे तुम्ही सरकारवर विश्वास ठेवला आहे. माझा नेहमीच विश्वास आहे की आपण जो काही निर्णय घेतो त्यावर ठाम राहिले पाहिजे. आपण वारंवार निर्णय बदलू नयेत. यामुळे जे जोखीम पत्करण्यास तयार आहेत त्यांना सुरक्षिततेची भावना मिळते. त्यांच्या चुकीमुळे काही चुकीचे घडले, तर ती वेगळी बाब आहे, पण कोणीही त्यांना वाऱ्यावर सोडून देणार नाही याचा विश्वास टिकवून ठेवायचा आहे. मला खात्री आहे की भारत अवकाश क्षेत्रात जगभरातील प्रतिभेला आकर्षित करू शकतो."

"भारतात प्रतिभेची कमतरता नाही"

पंतप्रधान म्हणाले की, आपण असे वातावरण आणि व्यवस्था निर्माण केली पाहिजे की, जेव्हा जग अंतराळ क्षेत्राबद्दल विचार करेल, तेव्हा भारताकडेच सर्वप्रथम पाहिले जावे. आपण एखाद्या भारतीय स्टार्टअप किंवा भारतीय अंतराळ संस्थेशी संपर्क साधला पाहिजे. आपण या सर्व प्रतिभावंतांना चुंबकाप्रमाणे आकर्षित करू शकतो. ही आपल्यासाठी एक मोठी ताकद ठरू शकते. आपण खूप किफायतशीर आहोत. आपल्याकडील प्रतिभावंतांच्या गुणवत्तेबद्दल कोणतीही शंका नाही आणि आपल्या लोकांमध्ये नैसर्गिक जोखीम पत्करण्याची क्षमता आहे. त्यामुळे, आपण या क्षेत्रात आपले अद्वितीय स्थान वेगाने प्रस्थापित करू शकतो. त्यांनी अटल टिंकरिंग लॅब्ससोबत मिळून काम करण्याबद्दलही सांगितले. यामुळे लहान मुलांमध्ये लहानपणापासूनच अंतराळाबद्दल कुतूहल आणि आवड निर्माण होऊ शकते.

कुणाची होती उपस्थिती?

२० स्टार्टअप्सचे सीईओ आणि संस्थापक सहभागी झाले होते. यामध्ये स्कायरूट एरोस्पेस, अग्निकुल कॉसमॉस, पिक्सेल, ध्रुव स्पेस, गॅलेक्सीआय, पियरसाइट, बेलाट्रिक्स एरोस्पेस, दिगंतरा, सॅटश्योर, सुहोरा टेक्नॉलॉजीज, मनस्तू स्पेस, ॲस्ट्रोबेस, टेकमी२स्पेस, व्योमिक, कॉस्मोसर्व्ह स्पेस, ऑर्बिटएड एरोस्पेस, स्कायसर्व्ह (हायस्पेस), सेरेंडिपिटी स्पेस, व्हॅसर लॅब्स आणि मिस्टईओ यांचा समावेश आहे.