महापालिकेत ५७ जागा जिंकलेल्या भाजप महापौरपदी कुणाची वर्णी लावते याची गेल्या दोन तीन आठवड्यांपासून उत्सुकता होती. बहूमतासाठी अवघी १ जागा कमी असल्याने भाजप राज्यात सत्तेत सोबत असलेल्या शिवसेना शिंदे गटाला सोबत घेणार का, हाही कळीचा प्रश्न होता. त्यातच जिल्हा परिषद पंचायत समिती निवडणूकीत दोन्ही पक्षांनी युती केली. त्यामुळे महापालिकेतही दोन्ही पक्ष समन्वय साधणार का, याकडेही राजकीय धुरीणांचे लक्ष होते. मात्र आज अखेर भाजपने शिवसेनेला अंधारात ठेवत दोन्ही नावे जाहीर केली. भाजपने शिंदे गटाच्या राजेंद्र जंजाळ यांना उपमहापौरपद देत असताना पालकमंत्री संजय शिरसाट यांचे समर्थक मात्र अनभिज्ञ होते. इकडे जंजाळ यांची शहरभर चर्चा होत असताना पालकमंत्री आणि त्यांचे समर्थक मात्र असे काहीच झाले नाही, उपमहापौर पदासाठी तीन नावे शर्यतीत आहेत, अजून निर्णय व्हायचा असल्याचे सांगत असल्याचे होते. त्यामुळे शिंदे गट फुटल्याच्या चर्चेला तोंड फुटले. याबाबत पालकमंत्री शिरसाट यांच्याशी बोलण्याचा प्रयत्न केला असता ते उपलब्ध झाले नाहीत.