श्रीनगर, दि.28 (वृत्तसंस्था): जम्मू-काश्मीरमधील दक्षिण आणि उत्तर भागात प्रत्येकी दोन अशा चार ठिकाणी सुरक्षा दलाच्या जवानांची दहशतवाद्यांसोबत चकमक सुरू आहे. शोपियां जिल्ह्यातील केल्‍लर येथे आज पहाटे सुरक्षा दलाचे जवान आणि दहशतवाद्यांदरम्यान झालेल्या चकमकीत तीन दहशतवादी ठार झाले. यावेळी दहशतवाद्यांकडील मोठा केल्‍लर येथे काही दहशतवादी लपून बसल्याची खबर मिळाल्यानंतर सीआरपीएफचे जवान, लष्कर आणि जम्मू-काश्मीर पोलिसांनी संयुक्‍तरीत्या आज पहाटे या परिसरात शोध मोहीम सुरू केली. त्यावेळी दहशतवाद्यांनी गोळीबार केला. त्यामुळे पोलीस व जवानांनीही त्याला जशास तसे प्रत्युत्तर दिले. दहशतवादी आणि जवानांमध्ये तासभर चकमक उडाली. त्यात तीन दहशतवाद्यांना कंठस्नान घालण्यात जवानांना यश आले. या तिन्ही दहशतवाद्यांचे मृतदेह आणि त्यांच्याकडील शस्त्रसाठा जप्त करण्यात आला आहे. या परिसरात आणखी काही दहशतवादी लपून बसले असण्याची शक्यता असल्याने या परिसरात सर्च ऑपरेशन करण्यात आले आहे.
दरम्यान, हंदवाडा येथील यारू भागात काही दहशतवादी लपून बसले असून, येथील अद्याप चकमक सुरू आहे. जम्मू-काश्मीर पोलिसांनी या भागाला वेढा दिला असून दहशतवाद्यांना चोख प्रत्युत्तर दिले जात आहे. या ठिकाणी दोन ते तीन दहशतवादी लपून बसले असण्याची शक्यता वर्तवण्यात येत आहे.
