नवी दिल्ली : विधानसभा निवडणुकीसाठी आसाम आणि केरळ या दोन राज्यांमध्ये आणि पुदुचेरी या केंद्रशासित प्रदेशात मोठ्या प्रमाणात मतदान झाले. 1950 मध्ये आसामची निर्मिती झाल्यापासून राज्यात 85.91टक्के मतदानाची नोंद झाली, जे आतापर्यंतचे सर्वाधिक मतदान आहे. यापूर्वीचा विक्रम 2016 मध्ये 84.7 टक्के होता. पुदुचेरीमध्ये स्वातंत्र्यानंतरचे सर्वाधिक 89.87 टक्के मतदान झाले. यापूर्वीचा विक्रम 85 टक्के होता. (2006, 2011 आणि 2016 च्या विधानसभा निवडणुकांमध्ये).

केरळमध्ये 1987 नंतरचे सर्वाधिक 78.27 टक्के मतदान  

केरळमध्ये 1987 नंतरचे सर्वाधिक 78.27 टक्के मतदान झालं आहे. मतदानाच्या टक्केवारीची ही आकडेवारी 10 एप्रिल रोजी संध्याकाळी 8 वाजेपर्यंतची आहे. निवडणूक आयोगाने अद्याप अंतिम आकडेवारी जाहीर केलेली नाही. आसाममधील 126 जागांवर 41 पक्षांच्या 722 उमेदवारांचे भवितव्य ठरणार आहे. 35 पैकी 26 हून अधिक जिल्ह्यांमध्ये 80 टक्क्यांपेक्षा जास्त मतदान झाले. दक्षिण सालमारा मानकाचर जिल्ह्यात सर्वाधिक 95.56 टक्के मतदान झाले. पश्चिम कार्बी आंगलोंगमध्ये सर्वात कमी 75.25 टक्के मतदान झाले. केरळमध्ये 140 विधानसभा जागांवर 26 दशलक्ष मतदार आहेत. यावेळी 883उमेदवारांनी निवडणूक लढवली. राज्यातील 14 जिल्ह्यांपैकी दोन जिल्ह्यांमध्ये 80 टक्क्यांपेक्षा जास्त मतदान झाले. दहा जिल्ह्यांमध्ये 70 टक्क्यांपेक्षा जास्त मतदान झाले. कोझिकोडमध्ये सर्वाधिक 81.32 टक्के मतदान झाले. पथानामथिट्टामध्ये सर्वात कमी 70.76 टक्के मतदान झाले. केरळमध्ये 2.71 कोटी मतदार 890 उमेदवारांमधून आपल्या नेत्याची निवड करत आहेत.

"महिला मतदारांमुळे मतदानाचे प्रमाण वाढले"

सीपीआय(एम) नेते सी.एन. मोहनन म्हणाले की, जे लोक मरण पावले आहेत किंवा दुसरीकडे राहायला गेले आहेत, त्यांची नावे मतदार यादीतून वगळण्यात आली आहेत. त्यामुळे मतदानाची टक्केवारी वाढली. भाजप नेते के.एस. शैजू म्हणाले, "आमच्या विश्लेषणानुसार, यावेळी अधिक महिला मतदारांनी मतदान केले आहे."

प्रत्यक्षात तीन कारणे समोर 

मुख्यमंत्री पिनारयी विजयन यांच्या विरोधात असलेली सत्ताविरोधी लाट. विजयन 10 वर्षांपासून मुख्यमंत्री आहेत. यावेळी मुस्लिम मतदारही सीपीआय(एम)च्या विरोधात एकजुटीने मतदान करण्यासाठी बाहेर पडले आहेत.

विजयन यांच्यानंतर सीपीआय(एम)कडे दुसऱ्या फळीतील नेतृत्वाची कमतरता आहे. अनेक नेत्यांनी भाजप आणि काँग्रेसमध्ये प्रवेश केला आहे. कार्यकर्ते नाराज असल्याचे दिसून आले.

शबरीमालासारख्या धार्मिक मुद्द्यांवर सर्वोच्च न्यायालयात राज्य सरकारने घेतलेल्या भूमिकेबद्दलही लोकांमध्ये मोठ्या प्रमाणावर असंतोष आहे.

शबरीमाला मंदिरातील सोन्याच्या चोरीचा मुद्दाही एक मोठा मुद्दा असल्याचे दिसून आले. सीपीआय(एम)च्या मुख्य मतदार मानल्या जाणाऱ्या महिला विशेषतः नाराज आहेत. भाजप आणि काँग्रेसनेही या मुद्द्यावर सरकारला घेरले असून, त्यामुळे त्यांच्या हिंदू कार्यकर्त्यांच्या मतपेढीला धक्का बसला आहे.

पुदुचेरीमध्ये 30 विधानसभा जागांवर एकूण 10 लाख मतदार आहेत. मतदानाची टक्केवारी 89.87 टक्के होती. या केंद्रशासित प्रदेशात दोन जिल्हे आहेत. पुदुचेरी जिल्ह्यात सर्वाधिक 90.47 टक्के मतदान झाले, तर कराईकलमध्ये 86.77 टक्के मतदानाची नोंद झाली. पुदुचेरीच्या इतिहासात पहिल्यांदाच इतक्या मोठ्या प्रमाणात मतदानाची नोंद झाली आहे.