छत्रपती संभाजीनगर,(सांजवार्ता ब्युरो): शहरातील अनेक भागांमध्ये आधीच आठ-आठ दिवसांनी पाणीपुरवठा होत असल्याने नागरिकांना मोठ्या अडचणींचा सामना करावा लागत आहे. त्यातच पाणीपुरवठ्याच्या दिवशी वारंवार वीजपुरवठा खंडित होत असल्याने नागरिकांच्या त्रासात आणखी भर पडत आहे. पाणी साठविण्यासाठी मोटार चालविणे शक्य होत नसल्याने अनेक कुटुंबांना पिण्याच्या पाण्यासाठीही संघर्ष करावा लागत आहे.

शहरात सध्या पाणीटंचाईची समस्या गंभीर बनली आहे. अनेक भागांत आठ तर कुठे दहा दिवसांनंतर पाणीपुरवठा होत असल्याने नागरिक त्या दिवसाची आतुरतेने वाट पाहत असतात. मात्र, पाणी येण्याच्या वेळेतच वीजपुरवठा खंडित होत असल्याने घरांमधील मोटारी बंद पडतात. परिणामी, टाक्या भरता येत नाहीत आणि उपलब्ध पाणीही वाया जाते. अनेक नागरिकांना नाईलाजाने खासगी टँकरवर अवलंबून राहावे लागत असून त्यासाठी अतिरिक्त आर्थिक भुर्दंड सहन करावा लागत आहे. महिला आणि ज्येष्ठ नागरिकांना याचा सर्वाधिक फटका बसत आहे.