नागपूर : राज्यातील राजकारणात पुन्हा एकदा खळबळ उडवणारे भोंदू बाबा अशोक खरात प्रकरण समोर आले असून, सत्ताधारी आणि विरोधकांमध्ये आरोप-प्रत्यारोपांची मालिका सुरू झाली आहे. काँग्रेस प्रदेशाध्यक्ष हर्षवर्धन सपकाळ यांनी सोशल मीडियावर केलेल्या ट्विटमुळे या प्रकरणाला नवे वळण मिळाले आहे. त्यांनी थेट मुख्यमंत्री देवेंद्र फडणवीस यांच्यावर गंभीर आरोप करत सत्ताधाऱ्यांतील अंतर्गत संघर्ष उघड केला आहे. या सर्व पार्श्वभूमीवर स्वतंत्र चौकशीची मागणी जोर धरू लागली असून, प्रकरणाचे राजकीय परिणाम काय होणार याकडे सर्वांचे लक्ष लागले आहे.
मित्रपक्षांवर गंभीर आरोप
सपकाळ यांनी दावा केला की, मित्रपक्षातील काही सहकाऱ्यांनी देवेंद्र फडणवीस यांचे मुख्यमंत्रीपद घालवण्यासाठी भोंदू बाबा अशोक खरात यांच्याकडून तंत्र-मंत्र व अघोरी पूजा करून घेतली. या घडामोडींनंतरच फडणवीस यांनी खरात यांच्याविरोधात कारवाई सुरू केल्याचा आरोप सपकाळ यांनी केला आहे.
निधी आणि संबंधांवर प्रश्नचिन्ह
२०१८ साली फडणवीस सरकारने खरात यांच्या इशानेश्वर मंदिरासाठी १.५ कोटी रुपयांचा निधी मंजूर केला होता, असा दावा करण्यात आला आहे. तसेच तत्कालीन मुख्यमंत्री कार्यालयाशी संबंधित अधिकारी मिलिंद बोरीकर यांचेही खरात यांच्याशी जवळचे संबंध असल्याचे आरोप समोर आले आहेत.
मोठ्या नेत्यांशी कथित संबंध
या प्रकरणात केंद्रीय गृहमंत्री अमित शाह यांच्यासोबतचे फोटो समोर आल्याचे सांगितले जात आहे. तसेच मंत्री चंद्रकांत पाटील यांचेही खरात यांच्याशी निकट संबंध होते आणि त्यांनी अघोरी पूजा केल्याची माहिती असल्याचा दावा सपकाळ यांनी केला आहे.
‘माहिती असूनही कारवाई उशिरा’
सपकाळ यांच्या मते, खरात यांच्या कारनाम्यांची माहिती फडणवीस यांना मागील सहा महिन्यांपासून होती. मात्र, त्यांच्या निकटवर्तीयांचे संबंध असल्याने कारवाई करण्यात विलंब झाला. आता या प्रकरणाचा वापर करून फडणवीस हे मित्रपक्ष व पक्षातील विरोधकांवर दबाव टाकत असल्याचा आरोपही त्यांनी केला आहे.
निष्पक्ष चौकशीची मागणी
या सर्व आरोपांच्या पार्श्वभूमीवर प्रकरणाची स्वतंत्र व निष्पक्ष चौकशी व्हावी, अशी मागणी विरोधकांकडून करण्यात येत आहे. चौकशी झाल्यास अनेक मंत्री व अधिकारी अडचणीत येतील, असा इशाराही सपकाळ यांनी दिला आहे.
